Lourdes – ina da las pli renumadas citads da la Frantscha. Quatter fin sis milliuns persunas visitan mintg’onn il lieu da pelegrinadi cristian en la regiun da Occitania. Legendas, miraclas ed istorgias reveleschan la citad en in vel mistic.
Ina matta, ina grotta ed visiuns misticas
Igl è sta ils 11 da favrer 1858, cura ch’il mund d’ina matta da Lourdes duai esser sa midà per adina. Ella è stada la figlia da muliners plitost povers, na saveva betg scriver ed era in pau maladitscha cun sia asma. Tuttina ha ella midà il destin da in'entira regiun. Ses num: Bernadette Soubirous.
Cun il destin da la matta duai avair midà quai onn er il qual da la citad da Lourdes. Tenor il mitos ha la matta da 14 onns numnadamain vis en ina grotta cun il num Massabielle, datiers da la citad da Lourdes, la Nossadunna – e quai betg be ina giada, mabain 18 giadas entaifer dad in mez onn. En las visiuns supplitgescha Nossadunna da stgavar en la grotta, uschia ch'ina funtauna è vegnida libra. Er supplitgescha ella da dumandar il prer da bajegiar ina baselgia tar la grotta.
Il prer sco era il pievel na less dentant savair nagut da questa parita celestiala. Las autoritads smanatschan a la matta cun praschun e clinica psichiatrica. Ma tuttina suondan adina dapli umans la matta a Massabielle, perquai che en la grotta capitan guariziuns inexplitgablas. Tar las malsognas guaridas tutgan para tranter auter la sclerosa multipla, la tuberculosa, malsognas infectusas sco er il cancer da l’ossa.
Lourdes – in lieu da pelegrinadi
Dal 1864 fin il 1872 era Lourdes ina destinaziun da pelegrinadi regiunala. Oriundamain n’era la grotta betg enconuschenta per sia forza curativa, ma suenter il 1873, cura che persunas èn vegnidas guaridas, ha la grotta sviluppà in renum naziunal e lura internaziunal. Bleras persunas van anc oz a Lourdes cun la speranza, che lur patiment prendia ina fin.
Or da l'archiv:
