Ella è situada en il nord da l’Italia ed è economicamain la regiun la pli avanzada. La Lumbardia represchenta er ina punt vers la regiun mediterrana.
Cun ses stgars 10 milliuns d’abitants, sparpagliads sin ina surfatscha da circa 24’000 kilometers quadrats, sumeglia la regiun bunamain ad in stadi naziunal.
Tut ils abitants n’èn dentant betg cuntents cun la refurma ch’il primminister da l’Italia Matteo Renzi ha introducì entaifer curt temp ed en in tempo fitg aut. La birocrazia saja uss anc pli cumplitgada ch’avant la refurma. Plinavant saja grev da metter tant ils giavischs e basegns dals milanais urbans ed ils valtellinais muntagnards sut in tetg.
Cunzunt ils abitants da la Vuclina vulessan pli gugent far part dal pajais vischinant, da la Svizra.