- Il president da la protecziun da la Constituziun en Germania, Hans-Georg Maassen, sto bandunar ses post.
- L'um da 55 onns daventa secretari da stadi en il ministeri da l'intern, là n'è el dentant betg responsabel per la protecziun da la Constituziun.
- Per Maassen munta questa midada perfin ina promoziun en ina classa da paja pli auta.
Quai ha la regenza communitgà suenter in inscunter da la chanceliera Angela Merkel (DCU) cun il schef da la CSU e minister da l'intern, Horst Seehofer sco era la scheffa da la SPD Andrea Nahles. Avant l'inscunter da crisa avevan Merkel e Seehofer anc tschertgà ina furmla da cumpromiss.
Il minister da l'intern, Horst Seehofer schazegia la cumpetenza da Maassen en dumondas da la segirezza publica. La SPD aveva insistì che Maassen stoppia dar giu ses post, suenter ch'el aveva fatg remartgas dispitaivlas davart las escalaziuns a Chemnitz.
«Ina cugliunaria nunditga»
La midada trametta ord vista dals Verds in signal fatal. «Jau chat quai catastrofal, perquai che quai è ina promoziun», ha ditg Irene Mihalic, commembra da la cumissiun per l'intern a l'agentura da novitads tudestga. Maassen vegnia uss er anc premià per ses sbagls.
La presidenta da la fracziun dals Verds, Katrin Göring-Eckardt ha ditg: «Quai è ina cugliunaria nunditga.» Tgi che premiescha «in sa cuntegnair illoial e gnochergnam cun l'AfD», empè da chastia quai, haja pers tut il sentiment per maniera – «e la SPD fa cun tut».
Tge precis che Maassen vegn a far en il ministeri da l'intern vul Seehofer communitgar mesemna.
Successur anc betg enconuschent
Tgi che duai succeder a Maassen sco president da la protecziun da la Constituziun n'è anc betg vegnì communitgà. En circuls da l'Uniun haja num, ch'il secretari da stadi actual, Hans-Georg Engelke saja stà en discussiun per il post l'entschatta da l'emna.
A Chemnitz avevi dà escalaziuns entras gruppas da dretg, suenter ch'in Tudestg era probablamain vegnì mazzà dad in requirent d'asil. Maassen vegn crititgà perquai ch'el aveva ditg, ch'el «n'haja naginas infurmaziuns crediblas» per ina «chatscha» sin esters tar las escalaziuns. Plinavant ha el mess en dumonda l'autenticitad d'in video ch'è cursà en l'internet.
RR novitads 20:00