Siglir tar il cuntegn

Exteriur Macron per multilateralissem e cunter politica da Trump

Il president franzos Emmanuel Macron è cleramain sa distanzià da la politica da Donald Trump. El ha pledà per multilateralissem e cunter quai ch'ils Stadis Unids bandunan la cunvegna d'atom cun l'Iran.

Emmanuel Macron.
Legenda: In ferm multilatersalissem saja a lunga vista la suletta resposta sin ils problems dal mund. Keystone

«Da serrar la porta al mund na vegn betg a frenar il svilup dal mund», ha il president ditg en ses pled avant las dus chombras dal parlament american. Ins sa chattia en in mument critic da l'istorgia. I saja impurtant da sa proteger sco cumminanzas globalas, saja quai en organisaziuns sco l'ONU u la Nato. Macron ha pledà da s'engaschar cunter isolaziun e naziunalissem. Quai sajan mesiras, che sajan mo a curta vista carmalantas. A lunga vista saja mulitlateralissem però la suletta resposta sin ils problems dal mund.

Betg uss, betg en 5 onns, betg en 10 onns

Macron ha er repetì ses appell a Trump, da betg bandunar nunponderadamain la cunvegna d'atom cun l'Iran. L'Iran na possia mai vegnir en possess d'armas nuclearas, questa finamira saja clera: «Betg uss. Betg en tschintg onns. Betg en diesch onns. Mai!», ha el accentuà. Perquai na possian ins betg simplamain bandunar la cunvegna senza remplazzament, er sche quella na saja forsa betg perfetga. Macron ha er confermà sia intenziun da vulair reglar en in nov concept total las relaziuns cun l'Iran.

Enfin ils 12 da matg ha Trump temp da decider, sch'el decretescha vinavant sancziuns cunter l'Iran. Questa decisiun vala numnadamain sco basa per l'avegnir da la cunvegna d'atom cun l'Iran.

RR novitads 06:00