Siglir tar il cuntegn

Header

Navigaziun

Purtret da Maduro durant in pled.
Legenda: Nicolás Maduro avertescha d'ina guerra civila. Keystone
cuntegn

Exteriur Maduro avertescha da guerra civila

En il cumbat per la pussanza cunter il president ad interim, Juan Guaidó n'excluda il president Nicolás Maduro betg ch'i pudess dar ina guerra civila en il pajais sidamerican.

Tut dependia da l'agressivitad e la sturnadad da l'imperi en il nord (USA) e da ses alliads dal vest, ha ditg Maduro en ina intervista cun l'emettur spagnol La Sexta. Il politicher da la sanestra ha accentuà ch'il pievel venezolan vivia simpel e pretenda che nagin sa maschaida en ils affars interns dal pajais. E la Venezuela sa preparia da proteger ses pajais.

Il president american, Donald Trump haja gia sin maisa l'opziun militara. Maduro ha fatg cler en l'intervista ch'el na saja betg pront da dar si il pajais. I dettia ina campagna da metter nà la Venezuela sco monster, sco dictatura.

Ultimatum renvià

L'ultimatum da set pajais da l'Uniun europeica ha Maduro renvià vehementamain. La Venezuela n'acceptia nagins ultimatums. La Germania, la Frantscha, la Spagna, il Portugal, la Gronda Britannia, il Pajais Bass sco era la Belgia vulan che Guaidó vegnia renconuschì sco president legitim en cas che Maduro na cloma betg ora novas elecziuns per il presidi dal pajais.

RR novitads 14:00