Venezuela vegnia a cumbatter per ses dretg sin Citgo, ina societad affiliada dal concern statal d'ieli cun sedia en ils Stadis Unids, avant dretgiras americanas. Quai ha annunzià il president dal pajais, Nicolás Maduro.
Ordavant aveva il minister da finanzas american, Steven Mnuchin, proclamà sancziuns cunter il concern d'ieli statal. I saja vinavant pussaivel da cumprar ieli da la Venezuela, dentant stoppian ils pajaments vegnir fatgs sin contos bloccads.
Betg pli sblundregiar ils Venezolans
Ils Stadis Unids hajan scuvrì la corrupziun dal president Nicolás Maduro, ha ditg John Bolton il cussegliader da segirezza naziunal a las medias. Cun las sancziuns vegnia garantì cha la facultad dals Venezolans na vegnia betg pli sblundregiada.
Avant intgins dis aveva Trump renconuschì il president dal parlament venezolan, Juan Guaido, sco president transitoric.
RR novitads 06:00