Il president venezolan Nicolás Maduro ha renvià l'ultimatum da l'Uniun europeica (UE) da far novas elecziuns libras. Nagin na possia dar ad el in ultimatum, ha ditg Maduro a l’emettur «CNN Türk». La Venezuela na saja betg part da l’Europa. Quai saja in’impertinenza. Tenor Maduro ha Juan Guaido cuntrafatg a la constituziun cun sa declerar nov president.
La Germania, la Frantscha, la Spagna e la Gronda Britannia avevan dà temp 8 dis a Maduro da fixar novas elecziuns per sclerir, tgi che saja il schef dal stadi venezolan. Mesemna passada aveva il president dal parlament Juan Guaidó provotgà il president da stadi Nicolás Maduro cun sa declerar sez president da stadi interimistic. Dapi lura n'è la situaziun betg clera. Entant che Guaidó dastga quintar cun il sustegl dals Stadis unids e plirs stadis latinamericans, sa lascha il president autoritar Maduro sin il militar e sias milissas.
RR novitads 15:00
