Siglir tar il cuntegn

Header

cuntegn

Exteriur Maioritad absoluta per AKP

En Tirchia ha il pievel elegì oz in nov parlament. Igl è la segunda giada aifer 5 mais. Tenor ils emprims resultats è la partida regenta AKP cleramain ordavant.

Suenter che var 95 % da las vuschs èn dumbradas or, vegnia la partida islam-conservativa dal president Recep Tayyip Erdogan sin radund 50,6 % da las vuschs; rapporta l'emettur CNN-Türk.

Cunquai vegniss l'AKP sin 325 sezs en il parlament, pia in toc dapli ch'ils 276 ch'i duvrass per la maioritad absoluta. Per midar la constituziun en favur da sia pussanza, duvrass il president Recep Tayyip Erdogan dentant ina maioritad da 2/3.

Il president Erdogan aveva inizià las elecziuns cunquai che las tractativas da coaliziun da la partida regenta AKP avevan fatg naufragi. Per l'emprima giada dapi il 2002 n'aveva l'AKP betg cuntanschì il pli absolut en il parlament.

Resultat definitiv pir en var 12 dis

Il resultat definitiv da las elecziuns parlamentaras en la Tirchia vegn pir publitgà en 11 u 12 dis. Quai ha ditg il schef da la cumissiun electorala. Uschia haja il gremi dapli peda d'examinar recurs da las partidas politicas.

En tut eran 56,6 milliuns Tircs clamads a l’urna.

RR novitads 18:00

Artitgels legids il pli savens