Italia dal Nord – duas persunas mortas e duas sparidas
En l’Italia dal Nord han lavurs da rumida cumenzà suenter la ferma plievgia.
Tenor ina emprima bilantscha da las autoritads èn duas persunas mortas e duas persunas èn sparidas. Quai scriva l’agentura da novitads taliana ansa.
En il Piemont sajan ils donns vid vias, punts e bajetgs oraifer gronds. A Limone Piemonte saja la situaziun catastrofala, hai num. En il Nord da l’Italia hai pluvì da venderdi sin sonda per part uschè fitg sco dapi decennis betg pli.
Frantscha dal Sid – almain 8 persunas sparidas
Era en la Frantscha dal Sid han tschients da gidanters cuntinuà cun la tschertga d'unfrendas suenter las malauras. En la regiun da la metropola Nizza, nua che vitgs èn stads bloccads, vegni furnì aua e mangiativas als abitants. Er l'armada saja en acziun, ha annunzià il schef da la regenza franzosa Jean Castex. En il departament Alpes-Maritimes èn almain 8 persunas sparidas. Dad ulteriuras na dettia nagina novitad, ha ditg Castex. Ins saja preoccupà pervia da la bilantscha definitiva.