En l'Italia è il dumber d'unfrendas creschì suenter las grondas malauras. Sco las autoritads han communitgà, han dapi il glindesdi almain 10 persunas pers la vita e quatter persunas èn vegnidas blessadas fermamain. In um vala anc sco sparì a Catanzaro en la Calabria.
Pervi dad undas da fin a 10 meters ha la Regiun Liguria serrà tut ils ports da mar. Ils bastiments ston spetgar avant la costa fin ch'il stemprà è a fin. Er l'eroport internaziunal a Genua era serrà il mardi a bun'ura. Tut ils sgols èn vegnids stritgads. Ed en il sidvest da Genua ha il stemprà stgarpà pliras jachts da luxus ord lur fixaziuns ed ha laschà sfratgar ellas cunter la riva.
Er a Venezia è la situaziun precara. Il glindesdi aveva l'aua gronda cuntanschì in'autezza da 156 centimeters sur il livel da la mar. 70% da la citad veglia era inundada. Il mardi è la situaziun sa meglierada levamain, spetgà vegn anc in livel da l'aua da 110 centimeters autezza.
RR novitads 08:00