En la Libia datti problems cun l'export d'ieli. Tenor la societad d'ieli da la Libia NOC n'èsi pervia dals malruaus politics per il mument betg pussaivel d'exportar ieli dal port da Zueitina en l'ost dal pajais. Ier avevan demonstrants a Zeuitina declerà ch'els blocheschian la producziun fin ch'il schef da la regenza – Abdulhamid al-Dbeibah – dettia giu ses uffizi. Plinavant pretendan els la relaschada dal schef da la societad d'ieli, Mustafa Sanalla.
La Libia producescha bun 1,2 milliuns barrels ieli per di. Ils pretschs per ieli pon ussa anc ina giada s'augmentar. Il martgà è gia tendì pervi da la guerra en l'Ucraina.
Dapi ch'il dictatur Muammar al-Gaddafi è vegnì destituì l'onn 2011 èsi caos en il pajais. 2014 è il pajais sa dividì en ina part da l'ost ed ina dal vest. 2019/20 ha la partida da l'ost emruvà da conquistar la citad principala, Tripolis, e ha destruì parts da quella.
