Siglir tar il cuntegn

Header

cuntegn

Exteriur Mar tschufragnada cun ieli – pli ch'ina milliarda indemnisaziun

15 onns suenter ch’il bastiment d’ieli «Prestige» è sfundrà avant la costa da la Spagna, ha ina dretgira a La Coruña decis ina summa d’indemnisaziun da passa 1,8 milliardas francs.

Ina assicuranza britannica da bastiment ed il capitani han da pajar al stadi Spagnol questa summa. Pussaivel saja dentant era da far responsabla la firma possessura dal bastiment, scriva la dretgira. In recurs cunter la sentenzia è anc pussaivel.

La gronda part da la summa d’indemnisaziun duai il stadi spagnol survegnir. Il rest va tenor la dretgira a la Frantscha (71 milliuns francs) e la regiun Galizia (2,1 milliuns francs).

Ina catastrofa ecologica

Il bastiment d’ieli aveva gì ina havaria durant in grev stemprà ils 13 da november 2002. El aveva 77’000 tonnas ieli a bord. Las autoritads spagnolas han lura scumandà a l’equipa a bord da charrar en in port. Intgins dis pli tard è il bastiment sfundrà. L’ieli ch’era culà ora aveva smerdà quasi 3’000 kilometers da la costa. Tenor stimaziuns da la Procura publica spagnola han ils donns muntà a passa 5 milliardas francs.

RR novitads 06:00

Artitgels legids il pli savens