Siglir tar il cuntegn

Header

Palmas a Florida en il vent dal hurrican Matthew.
Legenda: Il hurrican Matthew buffa a Florida. Keystone
cuntegn

Exteriur Matthew è vegnì pli debel

Sin ses viadi lung la costa dal sidost americana è il hurican vegnì main privlus. El lascha dentant enavos morts, glieud senza da chasa e cuntradas devastadas. En Florida moran 5 persunas. Sin l'insla Haiti ha il hurican chaschunà la mort dad almain 800 persunas.

Tenor meteorologs sa mova Matthew actualmain cun 140 kilometers l’ura – quai che correspunda ad in hurican da la categoria 1. Gia il venderdi era el vegnì classà en la categoria duas da quatter sin la scala da privel.

Il hurican «Matthew» sper la costa da Florida, registrà dad in satellit da la NASA.
Legenda: Il hurican «Matthew» sper la costa da Florida, registrà dad in satellit da la NASA. Keystone

Matthew en il sidost dals Stadis Units

En ils stadis federativs da South Carolina e Georgia haja dat diversas inundaziuns. Da persunas mortas na scrivan las agenturas betg. A Florida percunter èn mortas 5 persunas. Ed era a Florida èn grondas parts da la costa da Florida inundadas, ha ditg il guvernatur dal stadi federativ american.

En tut èn passa dus milliuns abitants vegnids admonids dad ir en lieus segirs. Tenor las medias è quai la pli gronda evacuaziun dapi il stemprà Sandy l'onn 2012 en l'ost dals Stadis Unids.

Purtret d'ina dunna che rimna ensemen tocca da la chasa.
Legenda: Bleras chasas èn destruidas a Haiti. Keystone

Anc dapli unfrendas a Haiti

Cun fugar sur la Caribica ha il hurican chaschunà la mort d'almain 800 persunas. Quai ha il senatur da Haiti ditg. Da regiuns isoladas da l'insla arrivan adina puspè rapports dad ulteriurs mortoris.

RR novitads 6.00 ++

Artitgels legids il pli savens

Scrollar a sanestra Scrollar a dretga