Anc il di ch’ella è entrada en uffizi ha Theresa May prendì en maun las mastrinas per manar la Gronda Britannia tras il temp suenter la votaziun da Brexit.
Nominà ina seria da ministers
Adherents dal Brexit duain esser responsabels per las relaziuns da la Gronda Britannia cun l'exteriur. May ha nominà l'anteriur president da la citad da Londra, Boris Johnson sco nov minister da l'exteriur.
Il nov-creà post d'in minister per la sortida da l'UE surpiglia il parlamentari conservativ David Davis. Ils ulteriurs posts impurtants en la regenza da May van a politichers ch'èn attaschads a la UE.
Gratulaziuns ed appels a May
La chanceliera tudestga, Angela Merkel ha gratulà a la nova prim-ministra britannica, Theresa May. Tenor il pledader da la regenza tudestga sajan omaduas dunnas perina ch'ins stoppia cuntinuar cun la collavuraziun cumprovada dals dus pajais.
Il president da la cumissiun da l'UE, Jean-Claude Juncker ed il president franzos François Hollande han appellà a May, da tschentar svelt ina dumonda per sortir da l'Uniun europeica.
May spera sin contractivas constructivas
May da sia vart haja ditg en ils telefonats cun Merkel ed Hollande che la regenza britannica dovria temp per preparar ils discurs da sortida. Ella speria sin contractivas constructivas.
RR novitads 06:00