La primministra da la Gronda Britannia, Theresa May, vul puspè lantschar la discussiun davart la dumonda da cunfin tranter l'Irlanda e l'Irlanda dal Nord. Quai ha ella ditg en il parlament a Londra. Cunzunt questa dumonda saja vinavant fitg dispitaivla en il parlament. Betg tema na sajan però in segund referendum u ina prolungaziun dal termin, uschia la primministra.
Quest'emna veglia ella manar discurs cun parlamentaris per chattar in pli grond support dal parlament. Cun il resultat veglia ella silsuenter confruntar l'Uniun europeica.
UE refusa ulteriuras negoziaziuns
L'Uniun europeica refusescha da princip la proposta da la primministra britannica Theresa May da far negoziaziuns supplementaras per il Brexit. Vi da la situaziun da partenza na saja sa midà nagut dapi l'emna passada, ha ditg in pledader dal president dal parlament da l'UE, Donald Tusk. L'UE saja adina pronta per in inscunter e per discurs. Ils 27 stadis restants da l'UE hajan dentant gia il december ditg, ch'i na dettia naginas negoziaziuns supplementaras pli.
Sche Brüssel e Londra na chattan nagin cumpromiss, smanatscha ils 29 da mars in Brexit caotic.
RR novitads 20:00