Siglir tar il cuntegn

Exteriur Mazzament da Jo Cox probablamain motivà politicamain

Dus dis suenter l’attatga mortala sin la politicra britannica Jo Cox è l’attentader suspectà vegnì interrogà d’ina dretgira a Londra. Tar l’interrogaziun è sa mussà ch’il mazzament è probabel motivà politicamain, rapportan agenturas da novitads.

A Londra han blers mess giu numerusas brevs, fluras e chandailas davant il parlament.
Legenda: Sa regurdar da Jo Cox: A Londra han blers mess giu numerusas brevs, fluras e chandailas davant il parlament. Keystone

L'assassin suspectà da la politicra britannica Jo Cox vegn inculpà uffizialmain d'avair mazzà la parlamentaria. La sonda ha l'um stuì cumparair davant dretgira a Londra.

Eventualmain contacts cun gruppaziuns extremistas da dretga

Cura che la dretgira haja dumandà il num haja l’um ditg dad aut: «La mort als traditurs, libertad per la Gronda Britannia». Quai rapporta l’agentura da novitads PA. Plinavant haja el refusà da tradir sias persunalias.

La polizia concentrescha sias investigaziuns sin gruppas extremistas da dretga. Gia avant aveva medias rapportà che l’um stettia en contact cun gruppaziuns da neo-nazis.

Raschun per mazzament n'è anc betg clera

La politicra pro-europeica Cox era vegnida mazzada gievgia passada sin via en il nord da la Gronda Britannia a Birstall. Las retschertgas actualas laschan supponer che l’um arrestà (52) saja il sulet ch’è stà involvì en il mazzament, declera la polizia. L’assagl sin Cox saja para stà «in’attatga isolada, ma intenziunada».

Cox era fermamain s'exprimida en favur da l'Uniun europeica. La polizia sclerescha schebain quai era la raschun che Cox è vegnida mazzada.

Brexit è e resta ina spada a dus taglioms

L’attentat ha schoccà ils Brits che decidan ils 23 da zercladur davart l'uschenumnà Brexit. Entant vesa quai ora sco ina maioritad dals Brits e da las Britas vul para restar en l'Uniun europeica. Quai tenor ina retschertga da l'emna passada fatga per telefon - anc avant l'attatga mortala sin Cox.

Tenor la retschertga èn passa 53 pertschient per l'UE. Bunamain 47 pertschient da las persunas dumandadas vulan che la Gronda Britannia sorta da l'UE. Il resultat da la votaziun n’è pia anc betg previsibel.

RR novitads 06:00 / 07:00 / 14:00

Commemoraziun

Tschients da persunas èn sa radunadas il venderdi saira en la vischinanza dal parlament a Londra per sa regurdar da Jo Cox. Blers han purtà fluras ed envidà chandailas.

Avant quest act era gia il primminister David Cameron ed il schef da la partida Labour jeremy Corbyn sa regurdads da Cox a Birstall.