Siglir tar il cuntegn

Header

cuntegn

Exteriur Medwedew: «Nova guerra fraida» - Poroschenko: «Agressiun russa»

Il schef da la regenza russa Dmitri Medwedew ha taxà las relaziuns tranter Moscau e l'Europa dal vest sco «nova guerra fraida». Quai ha el ditg a la conferenza davart segirezza a Minca.

Las relaziuns tranter l'UE e la Russia sajan ruinadas, en l'Ucraina regia ina guerra civila, ha ditg Medwedew. Concernent la Siria saja quai impurtant da mantegnair in stadi sirian unitar. La Siria na dastgia betg ir en muschna, uschia Medwedew. La Russia sustegnia en la Siria las truppas da la regenza en lur cumbat cunter ils rebels.

Poroschenko cun grevas renfatschas

Il president da l'Ucraina Petro Poroschenko ha fatg grevas renfatschas a la Russia. La crisa che perdura en l'ost da l'Ucraina na saja betg ina guerra da l'Ucraina, mabain l'agressiun da la Russia.

Ins stoppi mantegnair las sancziuns cunter la Russia. Ellas sajan in med per tegnair la Russia vi da la maisa da las tractativas. Il president dal parlament europeic Martin Schulz è d'accord cun Poroschenko. La regenza russa emprovia da divider l'Europa.

Tenor Steinmeier ina malencletga

Tenor il minister da l'exteriur tudestg Frank-Walter Steinmeier sa tracti però d'ina malencletga. El haja chapì Medwedew uschia ch'ins stoppia evitar ina situaziun che mainia ad ina nova «guerra fraida».

Steinmeier ha plinavant appellà a l'Uniun europeica da tegnair ensemen. Els stoppian s'engaschar per l'Europa durant quests temps burascus. En l'Europa dettia quai bleras crisas: tranter auter la crisa da l'euro, il populissem da la dretga e la crisa da fugitivs. Ins na dastga betg sa laschar divider.

RR novitads 12:00

Artitgels legids il pli savens