La cursa rapida ed il Super-G da las dunnas che fissan stadas la fin d'emna proxima a Garmisch-Partenkirchen èn annulladas. La raschun èn las temperaturas autas che fan grev da preparar la pista, ha communitgà la Federaziun internaziunala da skis, FIS.
A curta vista n'hajan ins betg chattà in auter lieu per far las duas cursas da las dunnas. Sco proxim spetga sin las spezialistas da speed la cuppa mundiala a Crans-Montana davent dal 16 da favrer.
