La chanceliera tudestga Angela Merkel è sa declerada pronta per discurs cun ils socialdemocrats per furmar ina nova regenza – l'uschenumnada coaliziun gronda. La CDU veglia esser l'ancra da la stabilitad. Merkel ha regurdà, quant impurtant ch'i saja d'avair relaziuns stabilas en la pli gronda economia publica da l'Europa per restar abel d'agir. Per quest motiv saja ella pronta da discutar cun la SPD.
Ils discurs cun la SPD duajan vegnir manads serius, cun engaschi ed onestamain e cun la finamira da serrar giu quels cun success. Basa da discussiun duaja il program electoral da la CDU esser. Premissas da cuntegn per ils discurs n'ha Merkel betg vulì numnar ordavant. I na saja betg pussibel da furmar ina regenza senza cumpromiss.
Ils 19 da november avevan ils discurs da sondagi per ina coaliziun da Jamaica cun las partidas CDU/CSU, FDP ed ils Verds fatg naufragi.
RR novitads 15:00
