L'anteriura chanceliera tudestga Angela Merkel ha condemnà la guerra en l'Ucraina. Ella ha dentant era defendì sia politica envers la Russia durant ils 16 onns da sia regenza. En l'emprima gronda intervista dapi sia demissiun avant in mez onn, ha ella ditg ad in schurnalist dal «Spiegel», ch'ins avess pudì fruntar a Putin pli ferm, suenter l'annexiun da la Crim, il 2014 – in sbagl saja sia reacziun dentant betg stada:
Ins n'haja era betg simplamain fatg nagut, la Russia saja vegnida sclausa da la gruppa da G8 e la NATO haja decis ch'ils pajais commembers hajan d'investir 2% dal product brut interiur per la defensiun. Ella na saja betg stada naiva en connex cun la Russia. Ella defenda er ch'ella è stada il 2008 encunter l'expansiun da la Nato direcziun ost, enturn l'Ucraina e la Georgia. Sche quests pajais fissan vegnids en la Nato, avess Putin gia lura pudì far grond donn en l'Ucraina.
Merkel na vuless betg telefonar cun Putin
Angela Merkel deplorescha ch'i n'è betg gartegià da stgaffir ina structura da segirezza suenter ch'il mir è crudà. Ina tala avess pudì impedir ina escalaziun.
En tut quels onns n'èsi betg gartegià da propi far fin a la Guerra fraida.
Sco mediatura en la guerra da l'Ucraina, na sa vesa ella betg. Sin la dumonda sch'ella telefonass cun Putin, ha ella ditg: «Jau n'hai betg l'impressiun che quai purtass il mument insatge. Ord mia vista datti pauc da discutar.»