Siglir tar il cuntegn
Inhalt

Exteriur Merkel: «Temp dad avrir in nov chapitel»

La chanceliera tudestga Angela Merkel sa retira dal post sco presidenta da la CDU e na candidescha betg pli per in'ulteriura perioda da legislatura sco chanceliera. Quai ha ha ella annunzià il glindesdi curt suenter l'ina avant las medias.

Angela Merkel sesa en in auto e guarda da fanestra or.
Legenda: Quant ditg è Angela Merkel anc chanceliera? Keystone

Suenter la terrada tar las elecziuns en il Bundesland Hessen tira la chanceliera tudestga Angela Merkel (CDU) las consequenzas. En ina decleraziun commoventa avant las medias ha Angela Merkel annunzià da vulair prestar ina «contribuziun persunala per la partida ed il pajais».

Merkel: Presidenta betg pli, chanceliera dentant (anc) bain

Ella mettia a disposiziun il post sco presidenta da la partida per che quella possia partir suenter il di da partida il december a Hamburg cun ina nova equipa en «in temp suenter mai», ha annunzià Merkel. La legislatura sco chanceliera veglia ella finir, dentant betg pli candidar il 2021 per ina tschintgavla legislatura. Ella veglia suenter betg pli surpigliar uffizis, ha ella agiuntà.

Fin uss haja ella adina accentuà che per ella tutgian quests dus uffizis ensemen – a questa idea renunzia ella uss perquai ch'ella saja persvadida ch'ina soluziun nova portia dapli schanzas che ristgs. Angela Merkel è dapi 18 onns scheffa da la CDU e dapi 13 onns chanceliera tudestga.

Cursa per il timun da la CDU averta

Gia annunzià sia candidatura per il presidi da la CDU haja la secretaria generala Annegret Kramp-Karrenbauer, scriva l'agentura AFP. Tenor ils rapports da pliras medias haja l'anteriur schef da fracziun da la Union, Friedrich Merz, interess. Sco auter interessent vegn er numnà il minister da sanadad tudestg Jens Spahn.

Sco gia la partida sora CSU en la Baviera ha er la CDU en il Hessen pers massivamain vuschs. I dat vuschs che pretendan consequenzas persunalas. En il decurs dal di vulan ils gremis politics a Wiesbaden e Berlin sa cussegliar e discutar.

RR novitads 11:00++