Siglir tar il cuntegn
Inhalt

Exteriur Merkel vul mantegnair posiziun sco chanceliera

La chanceliera tudestga Angela Merkel vul candidar anc ina giada per il presidi da la CDU e per l'uffizi da chanceliera. Midar curs per cumbatter ils populists vul ella però betg.

Angela Merkel ch'annunzia sia candidatura.
Legenda: Angela Merkel ha annunzià ch'ella candidescha per in'ulteriura perdioda d'uffizi sco chanceliera. Keystone

Cun ina politica moderada saja la CDU preparada bain per dar tegn ed orientaziun, ha ditg Merkel envers l'emettur ARD.

La dumengia suentermezdi aveva Merkel annunzià ch'ella candideschia per in'ulteriura perioda d'uffizi sco chanceliera. La partida stoppia dar novas e concretas respostas sin ils quitads dals burgais. Per cumbatter ils populists na vul Merkel dentant betg midar curs. Dal daventar pli conservativa e critica envers l'Islam na tegnia Merkel però nagut. Ella na veglia nagina isolaziun naziunala.

Angela Merkel è dapi il 2000 parsura da la CDU e dapi il 2005 chanceliera tudestga.

En Germania hai ils pli paucs populists

En ina retschertga vegn l'institut britannic «YouGov» ad ina conclusiun sumeglianta sco Angela Merkel: En nagin dals gronds stadis da l'Uniun europeica tendeschan ils umans pli pauc a la politica populistica ch'en Germania.

Fertant ch’auters pajais – surtut la Frantscha – mussan fermas tendenzas envers in populissem autoritar, sa mussia la Germania sco pajais il pli resistent. Quai di Joe Twyman, directur da perscrutaziun da «YouGov».

Tenor la retschertga partan be 18% dals Tudestgs las ideas politicas da partidas populisticas sco da la partida da dretga AfD. En Pologna percunter èn quai 78%, en Frantscha 63% ed en ils Pajais Bass 55%.

Umens pli vegls èn ils pli populistics

In factur impurtant è la vegliadetgna: Pli vegl che l'electur tudestg è e pli gronda che sia simpatia potenziala per partidas populiticas vegnia. Las ideas populisticas sajan er pli attractivas per persunas cun nivel d'educaziun mesaun che per persunas cun in nivel d'educaziun pli bass. Plinavant s'orienteschan umens dapli envers la politica populistica che dunnas; 65% en cumparaziun cun 35%.

Per relevar las datas dals dudesch stadis examinads èn vegnidas dumandadas almain 1000 persunas per stadi.

RR novitads 08:00+

Tge è politica populistica?

Politica populistica è ina politica opportunistica, che sa preschenta «datiers dal pievel». Per gudagnar la populaziun dramatisescha ella la situaziun politica acutala - savens da maniera manipulativa. Ella sa serva da las temas en il pievel ed offrescha soluziuns che paran dad esser simplas.