La tragedia è succedida sin la muntogna Meron, radund 50 kilometers davent da la citad da port Haifa. Plirs millis gidieus hajan festivà il di Lag Baomer, cura ch'i saja vegnì tar ina panica da massa.
Daco ch'i è vegnì tar la panica, n'è anc betg enconuschent. En il mument è la polizia anc vid far retschertgas. Tenor emprimas enconuschientschas èn dentant persunas sa glischnadas ora sin ina rampa e crudadas per terra. Silsuenter è la situaziun escalada. Plinavant n'èsi probabel betg stà pussaivel dad avrir las portas d'urgenza.
Charplinas cun la polizia
Suenter la tragedia ha la polizia empruvà da rumir il territori. Tenor differents rapports da medias israelianas n'han dentant tschients ortodoxs betg vulì bandunar il lieu.
Las autoritads avevan restrenschì il dumber da persunas a la festa sin radund 10'000 persunas. Tenor ils organisaturs han dentant almain 30'000 cartents da l'entir pajais fatg il viadi a Meron. Medias israelianas rapportan d'anc pli autas cifras.