Siglir tar il cuntegn
Inhalt

Exteriur Merz vul presidiar la CDU

Friedrich Merz, l’anteriur schef da la fracziun CDU/CSU en il Bundestag en Germania, vul candidar il december al di da partida per il presidi da la CDU. Quai ha annunzià uffizialmain il giurist da 62 onns.

purtret dal politicher tudestg Friedrich Merz
Legenda: Friedrich Merz, el è l'emprim che fa public ses interess per il post da president da la CDU/CSU. Keystone

El saja sa decidì suenter profunda ponderaziun da candidar per il post da president da la CDU. Las partidas CDU e CSU hajan da basegns d'ina nova entschatta ed innovaziun e quai cun persunalitads cun dun da manar, versadas e giuvnas, ha Merz accentuà a scrit.

Liberaleconomic e conservativ

L'expert da finanzas valeva ina giada sco portasperanza da l'uniun da CDU/CSU. Suenter la terrada da las partidas tar las elecziuns il 2002 ha Merkel lura stuschà Merz ord ses post da schef da fracziun. Dapi lura èn els dus stads en il clinch.

Il 2009 è Merz sa retratg da la politica activa, quai che haja flaivlentà il curs da l'economia da martgà. El ha er survegnì offertas da daventar commember da la FDP, quai ha Merz dentant refusà. Il bab da trais uffants è sa concentrà sin sia lavur sco advocat d'ina chanzlia d'economia internaziunala a Düsseldorf.

Angela Merkel ha annunzià il glindesdi ch’ella na candideschia betg pli per il presidi da sia partida e ch'ella na candideschia er betg pli per in'ulteriura perioda d'uffizi sco chanceliera. Quai sco consequenza da las perditas a las elecziuns en la Baviera sco era en il Hessen.

RR novitads 16:00