Siglir tar il cuntegn

Header

video
Papa Francestg dat la bendedicziun «Urbi et Orbi»
Or da News-Clip dals 04.04.2021.
laschar ir
cuntegn

Messa da Pasca en il Vatican Papa crititga conflicts armads ed appellescha da parter vaccins

En ses messadi tradiziunal da Pasca ha papa Francestg crititgà che conflicts armads cuntinueschian, malgrà la pandemia. Pervi da la protecziun da la sanadad è la messa da Pasca gia per la segunda giada stada en il dom da son Peder. Suenter la messa ha il papa dà la benedicziun per «Urbi et Orbi».

En ses messadi da Pasca ha papa Francestg avertì d'ina cursa d'armament che continueschia malgrà la pandemia. Quella saja anc adina fermamain activa. La crisa sociala ed economica saja anc adina pesanta, surtut per ils pli povers, ha ditg il parsura da la Baselgia catolica la dumengia en il dom da son Peder. Ed el ha cuntinuà:

Tuttina – e quai è scandalus – na prendan ils conflicts armads nagina fin ed ils arsenals militarics vegnan rinforzads.
Autur: Papa Francestg

Ultra da quai ha il papa appellà a la communitad internaziunala da parter ils vaccins cunter Covid-19 cun ils pajais pli povers.

Messa da Pasca en pitschen ravugl

Pervi da la pandemia da corona è la messa da Pasca gia per la segunda giada vegnida fatga en il dom da son Peder. Uschiglio celebrescha il papa la levada da Jesus davant dieschmillis da cartents sin la Plazza da son Peder.

video
Papa Francestg celebrescha la messa da Pasca
Or da News-Clip dals 04.04.2021.
laschar ir

En la gronda baselgia en il Vatican han pervi da la protecziun da sanadad be radund 200 persunas pudì persequitar la ceremonia. La messa dal papa è stada da vesair en l'internet e divers emetturs da televisiun sin l'entir mund han mussà quella.

Benedicziun «Urbi et Orbi»

Suenter la messa da Pasca ha il papa dà la benedicziun «Urbi et Orbi», per la citad da Roma e per l'entir mund. Cun quella benedicziun relascha il parsura da la Baselgia catolica ils chastis per putgads confessads e ch'ins s'enricla. Per regla vegn quella benedicziun be dada da Pasca e da Nadal e suenter ina elecziun d'in papa. Pervi da la pandemia ha papa Francestg dà l'onn passà ina benedicziun supplementara.

RTR novitads 14:00

Artitgels legids il pli savens

Scrollar a sanestra Scrollar a dretga