Siglir tar il cuntegn

Header

cuntegn

Exteriur Michael Flynn vul s'exprimer davart contacts russ da Trump

L'anteriur cussegliader da segirezza dals Stadis Unids, Michael Flynn, è pront da sa declerar davart ils contacts da persunas enturn il president Donald Trump cun la regenza russa.

Tenor in rapport da la gasetta «Wall Street Journal» tschenta Michael Flynn dentant ina cundiziun per discurrer davart Trump e ses contact cun la regenza russa. Flynn pretendia immunitad sch'el s'exprimia avant las giuntas dals servetschs secrets, pia ina protecziun garantida.

Il favrer era Flynn sa retratg suenter sulet trais emnas en uffizi. El aveva zuppentà ch'el aveva gì contact cun l'ambassadur russ davart sancziuns. Demascrà è el vegnì da l'FBI che aveva tadlà en ils discurs. L'FBI fa adina puspè controllas tar l'ambassadur e taidla viaden discurs. Quai saja rutina da far uschia.

33'000 dollars per ina tschaina cun Putin

Michael Flynn è gia avant vegnì crititgà pervi da ses stretgs contacts en Russia. El è er gia passà si en l'emettur da televisiun dal stadi RT ed è sesì durant ina tschaina da gala sper il president russ, Vladimir Putin. Mez mars è vegnì ora ch'el haja laschar pajar per ir a la tschaina, 33'000 dollars.

RR novitads 06:00

Artitgels legids il pli savens