Militar sa maschaida en en il Zimbabwe

L’armada dal stadi african na vul betg discurrer d’in putsch militar. Dentant ha ella surpiglià per in temp la controlla dal stadi.

Schuldada enturn vehichels militars Bild in Lightbox öffnen.

Legenda da maletgs: Schuldada enturn vehichels militars datiers da la chapitala dal Zimbabwe Harare. Reuters

I saja necessari da surventscher ina crisa politica, sociala ed economica che daventia adina mendra, ha declerà il maior general Sibusiso Moyo en in pled a la televisiun statala. I na sa tractia betg d’in putsch militar. La finamira da l’acziun da l’armada saja da metter a fin al far da criminals. Il president Robert Mugabe (93) e sia famiglia sajan en segirtad.

«  Uschè spert che nus avain cumplenì nossa missiun, spetgain nus in return a la normalitad. »

Sibusiso Mayo
maior general da l’armada dal Zimbabwe

La notg da mardi sin mesemna hai tenor perditgas dà almain trais explosiuns en la chapitala Harare, era sajets han ins udì. Dapi mardi è la preschientscha militara en la chapitala s’augmentada.

Situaziun adina pli tendida

Il glindesdi aveva il schef dal militar dal Zimbabwe, general Constantino Chiwenga, smanatschà publicamain al president Mugabe. En vista a la situaziun critica en il pajais saja l’armada pronta da prender mesiras. L’emna passada aveva Mugabe relaschà ses vicepresident, in allià dal schef da l’armada

Bunamain 40 onns a la testa

Robert Mugabe maina dapi il 1980 il Zimbabwe, che produciva pli baud fitg bler gran. Dapi il 2008 patescha il pajais da las consequenzas d’ina greva crisa economica. Il pajais en il sid da l’Africa cun var 15 milliuns abitants vala entant sco in dals pli povers pajais dal mund.

RR novitads 06:00