Exteriur - Minister da giustia lascha examinar las renfatschas cunter il FBI
En ils Stadis Unids duai in procuratur public examinar decisiuns dal FBI durant il cumbat electoral 2016. Questa incumbensà ha il minister da giustia Jeff Sessions surdà.
Il minister da giustia Jeff Sessions ha incumbensà il procuratur public John Huber da prender sut la marella diversas decisiuns dal FBI durant il cumbat electoral il 2016. Huber duai examinar co la polizia federala haja investigà cunter la candidata per la presidenza, Hillary Clinton, e cunter il team dal cumbat electoral da Donald Trump. Ed sch'i haja dà eventualas surpassaments.
Divers senaturs avevan pretendì ch'in investigader spezial surprenda las examinaziuns. Tenor atgnas indicaziuns desista il minister da giustia da nominar in investigader spezial en quest connex. Gliez fiss numnadamain mo giustifitgà sut «circumstanzas extraordinarias».
FBI e cumbat electoral
Avrir la boxSerrar la box
Il FBI aveva durant il cumbat electoral investigà il cas da l'affera dad e-mail dad Hillary Clinton. Las investigaziuns n'han dentant betg gì per consequenza ina persecuziun penala. Quai vegn adina puspè crititgà da republicans.
En connex cun la candidatura da Donald Trump è il FBI s'occupà cun pussaivlas cunvegnas cun la Russia.
