Il Grischun è il sulet chantun triling da la Svizra. Sper il tudestg ed il rumantsch vegn discurrì talian en las quatter valladas dal sid. Tuttas trais linguas èn linguas uffizialas chantunalas. 10% da la populaziun grischuna discurra talian, dus terzs u radund 14’000 persunas vivan en il Mesauc, en Calanca, Bregaglia ed en il Puschlav. Ils territoris talians na furman betg in’unica regiun, mabain cumpiglian las quatter valladas dal sid e per part ils Italofons en la diaspora grischuna, spezialmain en l’Engiadin’Ota ed en la regiun dal Rain. Entant che la Val Calanca ed il Mesauc s’orienteschan culturalmain ed economicamain ferm vers il Tessin italofon, smanatscha il tudestg ferm il talian en il Puschlav ed oravant tut en la Bregaglia.
Il film da Ruedi Bruderer è in viadi cultural-istoric dad entasum la Calanca enfin giusum il Puschlav cun ina visita tar differentas persunas a Cauco, Verdabbio, Vicosoprano, Poschiavo e Brusio.