Siglir tar il cuntegn

Header

cuntegn

Exteriur Missiun da la Nato en la Mar Egeica

Il Pact militar dal Atlantic dal Nord Nato ha survegnì glisch verda per sia missiun en la Mar Egeica. Sco ella ha communitgà sajan la Tirchia e la Grezia sa cunvegnids sin in territori tranter l’insla grecca Lesbos e la Tirchia.

La missiun da la Nato duai cumenzar oz dumengia, communitgeschan ils responsabels. Ils bastiments duajan localisar bartgas da fugitivs ed annunziar quellas a la guardia da la costa da la Tirchia. Alura po la guardia da la costa controllar, franar e liberar ils fugitivs. Il canal tranter la Tirchia e l’insla grecca Lesbos è ina da las pli frequentadas rutas dals fugitivs per arrivar da la Tirchia envers l’Uniun europeica en quest cas en Grezia.

Inscunter suprem da l’UE davart crisa da fugitivs

Damaun glindesdi ha alura lieu in inscunter suprem dals stadis da l’Uniun europeica davart la crisa da fugitivs. Oz dumengia è puspè vegni annunzia che 18 fugitivs sajan najads avant la costa da la Tirchia. 15 ulteriuras persunas haja la guardia da la costa pudì salvar, rapporta l'agentura da novitads statala tirca Anadolu. Malgrà che la Tirchia ha dà il pled ch’els vulan franar fugitivs da traversar la mar en direcziun da la Grezia emprovan migrants adina puspè d'arrivar sin questa via en l'Uniun europeica.

RR novitads 17:00

Artitgels legids il pli savens