Per l’emprima giada insumma è ina racheta vegnida sajettada da la Gronda Britannia en l’univers. Quai cun la missiun da transportar nov satellits pitschens en l’orbit. Il project haja dentant fatg naufragi. Quai ha communitgà l’interpresa americana Virgin Orbit. La racheta è vegnida transportada cun in Jumbojet da Newquay, en il sidvest da l'Engalterra, sin in'autezza da passa 10 kilometers. Sur l'Ocean Atlantic è la racheta, ch'era montada sut l'ala da l'aviun, partida en l'univers. Là ha ella dentant manchentà pervi dad ina anomalia d'entrar l'orbit planisà.
L'interpresa americana dal milliardari britannic Richard Branson organisescha gia partenzas da rachetas sumegliantas dapi l'onn 2021 dals Stadis Unids. Newquay è in da set «Spaceports» planisads en il Reginavel Unì. En la Scozia è planisà l'emprim start vertical d'ina racheta. La regenza spera, che l'industria spaziala portia radund 4,3 milliardas francs a l'economia britannica.
