Donald Trump intuna savens e gugent, ch'el n'haja betg temp per esser politicamain correct. E che quai na saja era betg necessari per el. In citat famus dal cumbat electoral è: «Jau pudess sajettar giu ina persuna sin la 5th Avenue amez New York e na perdess gnanc ina vusch.» Ed era sch'i va per dunnas n'è el betg fitg diplomatic. Uschia numna el dunnas ch'el n'ha betg gugent: «chauns, portgs gross ni animals stgiffus».
Jau pudess sajettar giu ina persuna sin la 5th Avenue amez New York e na perdess gnanc ina vusch.
Sch'i va per las posiziuns politicas ni socialas da Donald Trump n'èn quellas dentant betg pli radicalas che quellas da ses adversaris Ted Cruz e Marco Rubio. Uschia èn tuts trais per exempel per intensivar il cumbat encunter la gruppa terroristica Stadi Islamic, tuts trais vulan segirar meglier ils cunfins, tuts trais èn cunter far abort e cunter la maridaglia tranter omosexuals. E sco republicans èn els era tuts trais encunter Obamacare, la refurma da sanadad da Barack Obama.
Ed era tuts trais vulan midar il sistem da taxas. Ted Cruz vul che tut ils americans duain pajar en avegnir medem bleras taxas, numnadamain 10%, Marco Rubio vul sbassar las taxas per firmas pitschnas e Donald Trump vul sbassar las impostas pels pli povers ed ils ritgs.
Ins po damai dir, che Trump s'exprima bain en ina moda enorm directa e regularmain politicamain betg correcta, las posiziuns envers temas politics, economics ni socials èn dentant sumegliantas sco quellas da Cruz e Rubio.