Siglir tar il cuntegn

Header

cuntegn

Exteriur Monsanto dat in chanaster a Bayer

La fatschenta da milliardas è per entant giud maisa: L’offerta da Bayer è memia bassa per il concern d’agrochemia american Monsanto, sco l’interpresa communitgescha.

Il concern d’agrochemia american Monsanto refusa l’offerta da surpigliada da Bayer en l’autezza da 62 milliardas dollars. L’offerta saja «finanzialmain insuffizienta», ha communitgà Monsanto. Ella resguardia er memia pauc ils ristgs finanzials e regulatorics. Il management haja unanimamain decis da renviar l’offerta, saja però avert per discurs constructivs.

Il schef da Monsanto Hugh Grant ha tenor il communiqué ditg ch’ina «strategia integrada» pudess avair gronds avantatgs. L’actual’offerta da Bayer valiteschia dentant Monsanto bler memia bass. Il cussegl d’administraziun n’haja pretendì nagin plan da temp per ulteriurs discurs cun Bayer.

Surpigliada da record va per il mument da l'aua giu

Il glindesdi era quai vegnì enconuschent che Bayer veglia surpigliar Monsanto. I fiss stà la pli gronda surpigliada d’in’interpresa tudestga fin uss.

L’offerta per mintg’aczia da Monsanto munta latiers a 122 dollars. Investiders avevan crititgà l’aut pretsch, las aczias da Bayer fissan ruschnadas en tschaler. Però avevan experts da finanzas gia fatg quint che Monsanto veglia dapli. Uschia quintan ils analists da Bernstein ch’ils Americans vulan auzar l’offerta per aczia sin dapli che 140 dollars. Bayer pudess tenor ils analists porscher fin 135 dollars.

RR novitads 20:00

Artitgels legids il pli savens