Siglir tar il cuntegn

Header

cuntegn

Mort da George Floyd Trais policists sentenziads

Prest dus onns suenter che l'Afroamerican George Floyd è mort tar in'acziun da polizia en ils Stadis Unids, ha la dretgira sentenzià trais policists involvids.

Ina giuria ha declerà culpabels ils trais umens tar il process en il stadi federativ Minnesota. Ils dretgs da burgais da Geoge Floyd hajan els violà, rapportan medias or da la sala da la dretgira. Als policists vegn renfatschà ch'els n'hajan betg gidà Floyd medicinalmain. Dus dals umens èn ultra da quai culpabels da betg avair empruvà da franar la violenza. Als trais umens smanatscha uss in chasti da praschun.

La mort da Floyd, ils 25 da matg 2020 entras in'acziun da polizia violenta a Minneapolis, ha chaschunà protestas encunter rassissem e violenza da la polizia en l'entir pajais. Videos han documentà co policists han smatgà l'um betg armà sin il plaun. In dals policists, ha smatgà durant nov minutas cun ses schanugl sin il culiez da Floyd. Durant quest temp ha lez rugà il policist da laschar trair flad el. Ils trais collegas da l'emprim policist n'han betg franà el. Tenor il rapport da l'autopsia, ha Floyd pers la schientscha ed è mort.

L'emprim policist, che ha smatgà il schanugl sin il culiez da Floyd, era vegnì sentenzià en in auter process pervi da murdraretsch da segund grad. Ina dretgira a Minneapolis ha lura sentenzià el ad 22 onns e sis mais en praschun.

Il process ha in effect da signal en ils Stadis Unids. Giurors sajan uschia forsa plitost pronts da betg be sentenziar policists che mazzan insatgi mabain er policists che na fan nagut encunter.

RTR novitads 09:00

Artitgels legids il pli savens

Scrollar a sanestra Scrollar a dretga