Morts e blessads en Burkina Faso

Nunenconuschents han attatgà in café en la chapitala Ouagadougou e mazzà almain 18 persunas. La situaziun saja entant sut controlla.

Forzas da segirezza. Bild in Lightbox öffnen.

Legenda da maletgs: Policists segireschan il conturn da l'attatga en la chapitala da Burkina Faso. Reuters

  • Tar in'attatga sin in restaurant en Burkina Faso moran almain 18 persunas, tranter quellas er dus attatgaders.
  • Pliras ulteriuras sajan vegnidas blessadas, per part grevamain. Quai communitgeschan las autoritads localas.
  • Tenor rapports da medias han nunenconuschents sajettà sin in restaurant tirc en la chapitala Ouagadougou. Polizia ed armada han bloccà il conturn.
  • Entant saja la situaziun sut controlla.

Il minister da communicaziun discurra dad in'attatga terroristica fatga da dschihadists. Davart ils motivs n'ha el dentant anc fatg naginas indicaziuns. Sco medias localas rapportan, n'haja fin uss nagin surpiglià la responsabladad per l'attatga sin il restaurant en la chapitala dal pajais african.

Il schaner 2016 avevan trais terrorists islamistics attatgà in café en vischinanza dal restaurant pertutgà. Els han mazzà 30 persunas. Tranter las unfrendas eran er dus Svizzers. L'organisaziun terroristica «Al-Kaida» aveva fatg l'attatga ensemen cun in'organisaziun affiliada.

RR novitads 06:00