Siglir tar il cuntegn
Inhalt

Exteriur Mugabe vul murir avant ch'ir

Il president dal Zimbabwe, Robert Mugabe na vul betg sa retrair, malgrà ch'il militar ha surpiglià la pussanza. A Harare, la chapitala dal Simbabwe, demonstreschan millis persunas encunter Mugabe. Els spetgan ch'el vegnia cupitgà.

fulla cun transparents che demonstrescha
Legenda: Millis persunas èn en la chapitala Harare sin las vias e demonstreschan cunter Robert Mugabe ch'è president dapi 37 onns. Keystone

Il president dal Zimbabwe, Robert Mugabe na vul betg sa retrair, malgrà ch'il militar ha surpiglià la pussanza. El saja pront da murir per quai che saja gist, hai num ord tschertgels da sia parantella.

Millis demonstreschan, Mugabe na vul tuttina betg ir

Mugabe n'haja betg l'intenziun da legitimar il culp da stadi cun sia demissiun. Quatter dis suenter il putsch militar en il Simibabwe èn millis persunas en las vias da la chapitala Harare – els pretendan la demissiun da Mugabe. Las demonstraziuns èn paschaivlas.

Dapi il putsch militar da mesemna è Robert Mugabe (93 onns) en arrest da chasa. Dapi lura è il militar en discurs cun Mugabe per ch'el demissiuneschia. Quai senza installar sia dunna Grace (52 onns) sco sia successura. Tenor rapports betg anc confermads vul il militar installar ina regenza transitorica.

Critica era da l'atgna partida

Surprendentamain ha la partida da Mugabe che regia actualmain – la Zanu-PF – era pretendì la demissiun da Mugabe il venderdi. Robert Mugabe è president dapi il 1980.

RR novitads 09:00