Siglir tar il cuntegn
Inhalt

Exteriur Murdraretsch da Nemzow schochescha

L'assassinat dal criticher d'opposiziun russ Boris Niemzoff schochescha ils schefs da stadi dal vest.

Boris Nemzow
Legenda: Boris Nemzow è vegnì sajettà giu a mesa via en il center da Moscau. Keystone

La Svizra è consternada da l'assassinat dal criticher d'opposiziun russ Boris Niemzoff. En ina communicaziun condemnescha il departament federal da l'exteriur il murdraretsch brutal dal defensur da la democrazia e cumbattant cunter la corrupziun.

Hollande condemnescha assassinat

Er il president da la Frantscha, François Hollande ha condemnà a moda vehementa l'assassinat dal politicher da l'opposiziun russ, Boris Nemzow. La Russia stoppia far tut il pussaivel per sclerir l'assassinat. Ordavant avevan ils investigaders russ communitgà che l'assassinat saja vegnì planisà a moda minuziusa.

Quai saja in murdraretsch orribel dad in defensur da la democrazia curaschus e nunstanclentaivel, ha declerà Hollande. A medem temp ha el onurà il cumbat da Nemzow cunter la corrupziun.

Era Barack Obama ed Angela Merkel èn schoccads

Ordavant aveva gia il president american, Barack Obama sentenzià l'assassinat brutal. Era la chanceliera tudestga Angela Merkel è schoccada da l'assassinat dal politicher da l'opposiziun russ Boris Nemzow.

Ella ha appellà al president Wladimir Putin da garantir ch'il murdraretsch vegnia sclerì e ch'ils delinquents vegnian fatg responsabels per il delict.

Boris Nemzow è vegnì tutgà da 4 sajets en il dies

flurs
Legenda: La consternaziun è gronda en Russia. Keystone

L'anteriur viceschef da la regenza e criticher dal president Wladimir Putin era vegnì sajettà giu venderdi notg en il center da Moscau a mesa via. Tenor l'autoritad d'investigaziun russa era l'um da 55 onns vegnì tutgà da 4 sajets en il dies. Putin ha laschà declerà ch'i sa tractia dad in mazzament per incumbensa.

Adina puspe crititgà agressiuns russas

Nemzow aveva adina puspè crititgà las agressiuns russas cunter l'Ucraina. El avess gì da sa preschentar dumengia ad ina demonstraziun gronda cunter la politica dal president Wladimir Putin.

Marsch da commemoraziun

L'administraziun da la citad da Moscau lubescha in marsch da commemoraziun per il politicher da l'opposiziun Boris Niemzoff.

Il marsch planisà dumengia en il center da la chapitala russa possia avair lieu, ha ditg in pledader da la citad envers l'agentura da novitads RIA.

Il president russ, Wladimir Putin.
Legenda: Il president russ, Wladimir Putin vul far tut il pussaivel per chastiar ils assassins. Keystone

Wladimir Putin vul far tut per chastiar assassins

Il president russ Wladimir Putin ha empermess da far tut per chastiar ils assassins dal politicher da l'opposiziun Boris Nemzow. Er ils organisaturs da l’assassinat survegnian il chasti ch'els meritian, ha Putin scrit en sia carta da condolientscha a la mamma da Nemzow.

Entant che la polizia tschertga anc adina il u ils assassins, han pliras millis persunas exprimì lur commoziun cun purtar flurs e chandailas al lieu nua ch'il politicher è vegnì sajettà giu venderdi saira.

RR novitads 12:00/18:00