Sut autras circumstanzas, pia senza corona e senza il putsch dal militar, fiss Urs Auchter uss forsa vid pachetar las valischs per il Myanmar. Dentant quest onn è tut auter. La scola da cuschinar ch'el ha fundà ensemen cun l'organisaziun caritativa Swisscontact è vida – nua ch'ils scolars èn, na sa Urs Auchter betg.
Magari aud jau insatge da scolasts da mai ubain survegn videos che ma rumpan bunamain il cor.
Ils videos mussian sco il militar – che ha surprendì la pussanza il prim da favrer 2021 en il Myanmar – sajetta sin demonstrantas e demonstrants. Er sia scheffa saja anc en il Myanmar ed haja magari tema. «Cura ch'il militar è stà en quella part da Yangon nua ch'ella abitescha, han els udì culps e vesì sco tiradurs spezialisads han sajettà sin persunas da chasa viaden.»
Zuppà il material
In dals scolasts da sia scola saja sco emprim suenter il putsch dal militar ì en scola ed haja zuppà tut quai che saja custaivel, «perquai ch'il militar fetschia empaglia tut quai che pudess esser da niz per la populaziun», agiunta Urs Auchter. El spera fitg ch'il putsch dal militar na gartegia betg, «il pajais era sin uschè ina buna via».
Urs Auchter è stà l'emprima giada en il Myanmar il 2009 ed enconuscha uschia il pajais en tuttas duas furmas da stadi. Da lez temp era numnadamain er il militar a la pussanza. Ed el po numnar insaquants exempels che mussan la differenza tranter il pajais democratic ed il pajais en mauns dal militar. «Jau sun vegnì controllà l'emprima giada – er mes telefons vegnivan tadlads.» Suenter, il 2012, cura che la democrazia è sa messa atras, saja il pajais sa midà. «Uss ha quai per exempel er gronds hotels e l'entir pajais è vegnì pli modern».
Ord l'archiv da SRF: