Siglir tar il cuntegn

Header

cuntegn

Exteriur Nagin congedi da paternitad pajà da duas emnas

Il Cussegl naziunal è cunter in congedi da paternitad pajà. Uschia resti tut sco fin qua: Babs na dastgan betg avair duas emnas congedi pajà suenter la naschientscha da lur uffant.

audio
Saira: Cussegl naziunal di Na al congedi da paternitad pajà
ord Actualitad dals 27.04.2016.
laschar ir. Durada: 2 minutas 37 Secundas.

Il Cussegl naziunal ha debattà oz sur da l’iniziativa parlamentara da cusseglier naziunal Martin Candinas (PCD). Cun 97 cunter 90 vuschs e 5 abstenziuns è il resultat la finala fitg stretgs. Uschia è in congedi da patrimoni da duas emnas giud maisa.

Congedi da paternitad oz normal

Candinas aveva proponì da finanziar in congedi da paternitad sur l'urden da la cumpensaziun dal gudogn (EO). Babs avessan duì survegnir durant il congedi 80% da la paja, maximal 196 francs a di. Ils custs da radund 200 milliuns francs fissan vegnids purtads da patruns ed emploiads communablamain. Tenor il medem model han las mammas dapi il 2005 in dretg sin 14 emnas congedi da maternitad.

Tenor l’opiniun da Candinas è la preschientscha dal bab suenter la naschientscha d’in uffant da gronda impurtanza per in bun start en la vita da famiglia. In congedi da babs megliurai era la cumpatibilitad da professiun e famiglia. «In congedi da patrimoni fiss da niz per las famiglias e l’entira societad», ha ditg Candinas.

Tar fitg bleras interpresas grondas saja in congedi da patrimoni normal oz. Bleras interpresas pitschnas e mesaunas na possian betg purtar ils custs.

Travail.Suisse vul lantschar ina iniziativa per in congedi da paternitad

L’Uniun sindicala Travail.Suisse ha annunzià da lantschar ina iniziativa per introducir il congedi da paternitad da duas emnas. Quai sco reacziun ch’il parlament ha refusà oz in tal congedi.

RR novitads 14:00

Artitgels legids il pli savens