Siglir tar il cuntegn

Header

cuntegn

Exteriur Nagin tribunal da l'ONU per sclerir l'accident da l'aviun MH17

La Russia ha mess en il veto durant l'inscunter dal cussegl da segirtad da las Naziuns Unidas ed uschia impedi in tribunal independent per sclerir l'accident dal aviun MH17.

La Russia ha bloccà in tribunal independent da las Naziuns Unidas per sclerir l’accident da l'aviun MH17 avant in onn en l’Ucraina da l'ost. L’ambassadur russ Witali Tschurkin ha mess en il veto da la Russia cunter la resoluziun durant l’inscunter dal cussegl da segirtad da l’ONU.

Malgrà 11 vuschs per la resoluziun è quella uss ad interim giud maisa. Ils pajas da la China, da la Venezuela e da l’Angola èn s’abstegnids.

Trumpada per l'Ollanda

La regenza da l’Ollanda è sa mussada trumpada sur dal veto da la Russia. Sco il schef da la regenza da l’Ollanda Mark Rutte ha ditg, muntia quai in pass enavos. L’Ollanda veglia vinavant ch’ils responsabels vegnian avant in tribunal. Ensemen cun ulteriurs pajas vul l’Ollanda uss examinar autras pussaivladads per ina persecuziun penala.

Bleras unfrendas da l'Ollanda

L’aviun MH 17 era vegni sajettà giu avant in onn sur l’Ucraina dal Ost. Tut ils 298 passagiers eran vegnids per la vita. Tgi che ha sajettà giu l’aviun è anc adina intschert. Omaduas partidas da conflict rinfatschan ina a l’autra d’avair commess il delict.

RR Novitads 22:00/14:00

Artitgels legids il pli savens