Danovamain pretenda l'ONU ina pausa da cumbat da 48 uras per la citad siriana occupada Aleppo per che las furniziuns d'agid cuntanschan ils carstgauns en miseria. I smanatschia ina da las pli grondas tragedias umanitaras en l'entira guerra da la Siria, uschia hai num en ina decleranza.
Las organisaziuns d'agid n'hajan anc adina nagin access ad Aleppo, ha ditg il pli aut coordinatur da l'agid d'urgenza, Stephen O’Brien davant il Cussegl da segirezza. Plinavant ha O'Brien discurrì dad attatgas sin ospitals, reservas d'aua stgarsas e cunzunt d'attatgas cun gas toxics.
Il Cussegl da segirezza ha ina giada dapli appellà a las partidas da conflict da tschertgar ina schliaziun politica – senza sa cunvegnir ad concretas mesiras per far frunt a la situaziun en il pajais che patescha dapi passa 5 onns da guerra civila.
RR actualitad 06:00