Siglir tar il cuntegn

Header

cuntegn

Exteriur Naginas sancziuns concretas cunter la Russia

Dapli squitsch sin la Russia en la crisa da la Siria. Quai pretendan la Germania e la Frantscha dals ulteriurs 26 partenaris da l'UE.

Ils presidents da stadi e da regenza n'èn però malgrà attatgas ord l'aria sin la citad d'Aleppo betg vegnids da sa cunvegnir ad ina smanatscha da sancziuns concreta cunter la Russia.

Els condemneschan dentant las attatgas sin civilists e pretenda che quellas vegnian terminadas. Sco decleranza finala da l'inscunter da l'UE a Brüssel hai num che sche las brutalitads cuntinueschian traja l'UE en consideraziun «tut las opziuns che stattan a disposiziun».

I dovra ina pausa da cumbat duraivla per Aleppo.
Autur: Angela Merkel chanceliera tudestga
François Hollande ed Angela Merkel.
Legenda: François Hollande ed Angela Merkel pretendan ina pausa da cumbat duraivla per Aleppo. Keystone

La chanzeliera tudestga Angela Merkel aveva discurrì cler avant l'inscunter: L'offerta da las regenzas russas e sirianas na tanschia insumma betg. Cunquai ha la chanceliera reagì sin l'offerta dad in armistizi da singulas uras ad Aleppo. I dovria però ina pausa da cumbat duraivla.

Er il president franzos François Hollande ha reagì. El ha pretendì che la pausa da cumbat ad Aleppo stoppia vegnir respectada. tut las opsziun rstina sin maisa, ha ditg Hollande sin la dumonda davart novas sancziuns cunter la Russia.

En il sboz stevi anc scrit expressivamain «sancziuns». Tenor diplomats hajan cunzunt l'Italia, la Grezia e l'Ungaria fatg resistenza cunter las smanatschas da sancziuns.

RR novitads 08:00

Artitgels legids il pli savens