L'eroport da l'insla canara La Palma ha per il mument interrut il manaschi. Las pistas sajan cuvertas cun tschendra dal vulcan sin l'insla ch'è activ dapi la dumengia. La gestiunaria da l'eroport ha scrit via Twitter ch'ils teams da nettegiar sajan en acziun, che la situaziun possia però mintga mument sa pegiurar. L'erupziun dal vulcan è tenor las autoritads en sia pli vehementa e privulusa fasa da fin qua. Sgols sin las inslas vischinas Teneriffa e La Gomera han ins puspè pudir prender si.
420 chasas destruidas
Pervia da las explosiuns e la lava han var 6'000 persunas stuì vegnir evacuadas. Dapi ch'il vulcan è rut ora èn gia vegnidas destruidas 420 chasas e 190 hectaras èn vegnidas sepulidas, quai èn 265 plazzas da ballape. Igl n'è anc betg cler quant ditg che l'emprima erupziun dapi 50 onns cuzza anc.
