Siglir tar il cuntegn

Header

cuntegn

Exteriur Nagorny-Karabach – proclamada pausa da cumbat

L'Aserbaidschan ha proclamà in dumengia ina pausa da cumbat unilaterala per la regiun da Bergkarabach en il sid dal Kaukasus. L'armistizi saja in segn da buna veglia - ha communitgà il ministeri da defensiun da l'Aserbaidschan.

Las autoritads da la regiun Nagorny-Karabach han rapportà dentant era in dumengia da sajets per lunga la lingia da demarcaziun.

La regiun Nagorny-Karabach

Avrir la box Serrar la box

Là vivan en emprima lingia Armens. La regiun tutga dentant tenor dretg internaziunal tar Aserbaidschan. Al cumenzament dals onns 90 aveva Nagorny-Karabach rut cun l’Aserbaidschan en ina guerra cun passa 30’000 morts. L’armistizi, che vala dapi il 1994, è rumpaivel dapi onns. L’Aserbaidschan aveva smanatschà da vulair reconquistar la regiun rebella.

Inscunter da crisa da l'OSZE il mardi

La uschenumnada gruppa da Minsk da l’Organisaziun per la segirezza e la collavuraziun en l'Europa OSZE intermediescha en il conflict.

Tenor infurmaziuns or da l’OSZE planisescha la gruppa il mardi in inscunter da crisa a Vienna.

Escalaziun da violenza dapi dus dis

En la regiun Nagorny-Karabach avevan cumenzà avant dus dis cumbats ferms tranter schuldada dals dus pajais vaschins Aserbaidschan ed Armenia. Dapi lura èn vegnids passa 30 schuldads per la vita.

Las dus ex-republicas sovieticas sa dattan vicendaivlamain la culpa per las escalaziuns na-aspetgadas.

I sa tracta da l’escalaziun militara la pli greva en la regiun da Nagorny-Karabach dapi ch'ils dus pajais avevan decis in armistizi l'onn 1994.

RR novitads 17:00

Artitgels legids il pli savens