Siglir tar il cuntegn
Inhalt

Exteriur NATO: Dapli engaschi per Afghanistan e cunter Stadi islamic

A l'inscunter suprem a Warschau han ils pajais da la NATO decis da cuntinuar lur missiun d'instrucziun en l'Afghanistan era suenter il 2016. Ultra da quai vulan els intensivar lur stentas en il cumbat cunter l'uschenumnà Stadi islamic.

Politichers afghans.
Legenda: La delegaziun afghana a l'inscunter suprem da la NATO a Warschau 2016. Keystone

Ultra da quai finanzieschia la NATO l'armada afgana fin il 2020 cun almain 1 milliarda dollars mintg'onn. Quai ha ditg il secretari general da la Nato Jens Stoltenberg.

Per il 2016 avevan plirs pajais da la NATO atgnamain planisà da retrair truppas. Pervi dals success dals Taliban è quai però vegnì mess en dumonda. Quest'emna han gia ils Stadis Unids annunzià da franar la retratga da las truppas.

Dapli engaschi cunter Stadi islamic

Ultra da quai han ils schefs da stadi e da regenza decis da s'engaschar dapli cumbatter la milissa da terror Stadi islamic. Per far quai vulan els ch'aviuns d'exploraziun sustegnan directamain la coaliziun internaziunala cunter il Stadi islamic. Quai ha ditg il secretari general da la NATO Jens Stoltenberg. En pli duai la NATO instruir la schuldada iracaisa da nov en l'Irac sez. Fin uss vegniva quai fatg en il pajais vischin pli segir, la Jordania.

RR novitads 11:00