Siglir tar il cuntegn

Exteriur Nato dat or dapli daners per il militar

Ils stadis da la Nato dattan or adina dapli daners per il militar en vista d'ina periclitaziun creschenta entras la Russia. Tenor emprimas calculaziuns s'augmentan las expensas per la defensiun per bunamain 4%, uschia ha ditg il secretari general da la Nato, Jens Stoltenberg.

purtret da Jens Stoltenberg, il secretari general da la NATO
Legenda: Jens Stoltenberg dat il signal per cumenzar la seduta. Keystone

Il 2017 èn las expensas da defensiun s'augmentadas per 5%. Tenor Stoltenberg èn las expensas s'augmentadas dapi il 2014 per passa 87 milliardas dollars. Tut ils stadis da l'allianza hajan franà las reducziuns, i dettia dentant anc blera lavur, uschia Stoltenberg.

Cun las cifras vulan ils partenaris da la Nato mussar al president american Donald Trump, ch'els fetschian insatge per equilibrar las finanzas. Las expensas dals Stadis Unids n'èn betg resguardadas en las calculaziuns. Ils Stadis Unids èn actualmain responsabels per radund dus terzs da las expensas. Sulet il 2017 eran quai 686 milliardas dollars.

RR novitads 22:00