Siglir tar il cuntegn

Header

cuntegn

Exteriur NATO rinforza sia preschientscha en la Tirchia

La NATO ademplescha la supplica da la Tirchia ed ha decidì da survegliar il spazi aviatic tirc cun aviuns militars supplementars. Ultra da quai duai er vegnir rinforzada la preschientscha da la marina.

Il secretari general da la NATO, Jens Stoltenberg, ha accentuà ch'i sa tractia tar quest rinforzament sulet da mesiras defensivas. Tge pajais che sa participeschan cun quants schuldads n'è anc betg cler.

Respectar suveranitad dal pajais vischin

Entant ha il president american Barack Obama pretendì che la Tirchia retiria ses schuldads or da l'Irac. Quai ha pretendì il president american Barack Obama. La Tirchia stoppia respectar la suveranitad dal pajais vischin, ha Obama ditg en in discurs al telefon cun ses collega d'uffizi da la Tirchia, Recep Tayyip Erdogan. Vitiers stoppia la Tirchia er far dapli per deescalar la situaziun en l'Irac, uschia Obama.

L'entschatta december ha la Tirchia tramess radund 150 schuldads e 25 chars armads en la vischinanza da la citad Mossul ch'è occupada da la milissa terroristica Stadi Islamic.

RR novitads 09:00

Artitgels legids il pli savens