A la fin da la conferenza d'aua a New York ha il secretari general da las Naziuns Unidas, António Guterres, appellà als pajais da cumbatter cunter la stgarsezza da l'aua da baiver. Tut la speranza per il mund dependia d'ina midada dal curs. Ils projects che sajan vegnids discutads a la conferenza stoppian vegnir mess en vigur, era sche quels na sajan betg liants.
Quai munta da sminuir la pressiun sin noss sistem d'aua.
Era stoppian ins sviluppar sistems da nutriment alternativs per reducir l'utilisaziun betg persistenta da l'aua en la producziun da victualias e da l'agricultura. Las strategias en ils secturs aua, sistems ecologics e clima stuessan vegnir colliadas per reducir ils gas da serra – d'ina infrastructura stabla, conducts d'aua e plans per tractar l'aua persa fin ad in sistem da preavertiment cunter catastrofas da la natira.
La conferenza da las auas ha cuzzà da la mesemna fin il venderdi. Igl è stà l'emprim grond inscunter da las Naziuns Unidas dapi l'onn 1977, nua ch'ins ha tractà exclusivamain il tema aua.