En il Nepal dovran urgentamain dapli helicopters per pudair salvar e tgirar las 100’000 da persunas basegnusas suenter il grev terratrembel, quai communitgescha il ministeri da l'intern a Kathmandu.
La regenza nepalaisa haja 13 helicopters en servetsch. Auters pajais gidian cun ulteriurs 21. I dovria però almain dubel u trai-dubel uschè blers helicopters per cuntanscher las regiuns en il nord dal pajais.
Tar il terratrembel da la fin d'emna passada èn tenor las pli novas indicaziuns mortas passa 7200 persunas e 10’000 da persunas èn vegnidas blessadas.
