Siglir tar il cuntegn

Header

cuntegn

Exteriur Nepal: l'agid funcziuna, igl è dentant cumplitgà

Avant passa in mais ha la terra stremblì en il Nepal. I ha dà millis morts e blessads e donns enorms. La Chadaina da Fortuna ha rimnà passa 25 milliuns francs per il Nepal. A Kathmandu sez na vesian ins betg pli gronds fastizs dal terratrembel, la vita quotidiana giri vinavant, di Priska Spörri.

audio
Bunura: Passa in mais suenter il terratrembel en il Nepal
ord Actualitad dals 02.06.2015.
laschar ir. Durada: 4 minutas 36 Secundas.

La pledadra da la Chadaina da Fortuna ha visità il Nepal. Blers vitgs en la periferia sajan destruids dal tuttafatg. La populaziun vivi là en alloschis provisorics, fabritgads cun material da las chasas destruidas, tetgs da sturs e bategls.

Ils umans sajan traumatisads. Els hajan pers persunas charezzadas, possess ed els hajan era tema dad ulteriurs terratrembels. Dentant sappian els era, ch'i stoppia ir enavant. Uschia hajan els bajegià alloschis provisoris, els cultiveschian il terren per vivonda. Quai saja impressiunant, di Priska Spörri.

Las organisaziuns d'agid mussian engaschi cumplain. I saja dentant cumplitgà, pervi da las grondas distanzas. Tscherts vitg n'hajan ins anc adina betg cuntanschì.

Emprima prioritad ha l'agid d'urgenza: vivonda, provediment d'aua, alloschis d'urgenza, provediment medicinal e protecziun dals uffants. Blers ospitals èn destruids, e quels che funcziunan èn dal tuttafatg surchargiads.

La proxima prioritad saja da savair, tge che la populaziun dal Nepal dovria exact. Ils basegns dals basegns saja per exempel chasas che cumportan terratrembels, di Priska Spörri. Perquai vegnan ils scrinaris indigens scolads, co bajegiar chasas solidas.

Per turnar in zic normalitad als uffants cumenzan las scolas puspè. Là pon ils uffants discurrer da quai ch'els han vesì ed experimentà, ed els pon era sa fatschentar cun lur amis ed amias. La populaziun nepalaisa saja zunt engraziaivla per l'agid da la Svizra. Uschia na sa sentian els betg persuls cun lur destin, di Priska Spörri.

Artitgels legids il pli savens